Тарма сабабгори масдуд шудани роҳ дар километри 72-юми роҳи мошингарди Душанбе-Айнӣ шуд. Болоравии сатҳи оби рӯдхона муддате ҳаракат дар роҳи Душанбе-Рашт-Лахш-Қирғизистонро ҳам қатъ кард. Ҳоло ҳаракати мошинҳо дар ин минтақаҳо аз сар гирифта шудааст, аммо хатари лағзиши тарма, омадани селу ярч бартараф нашудааст. Аз ин рӯ Кумитаи ҳолатҳои фавқулода ва мудофиаи граждании Ҷумҳурии Тоҷикистон ҳушдор медиҳад, ки зимни ҳаракат дар роҳҳо эҳтиёткор бошед.
Тавре аз Кумита хабар доданд, боронҳои шадид ва резиши барфи рӯзи 10 марти соли равон лағзиши тарма ва омадани сел ба дунбол доштанд.
Чунончӣ, дар километри 72-юми роҳи мошингарди Душанбе – Айнӣ резиши барф сабабгори лағзиши тарма шуд. Бино ба гузориши мутахассисони Кумита, баландии ин ғарами азими барф беш аз 6 метр ва дарозии он ҳудудан 50 метр буд.
Барои бартарафсозии он ва тоза кардани роҳ дар ин қитъа наҷотдиҳандагони хадамоти наҷоти Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон, кормандони ширкати «Инновейтив Роуд Солюшнз» бо 4 техникаи барфрӯбӣ ва роҳтозакунӣ сафарбар шуданд.
Бо талошҳои якҷоя то соати 20:24 -и вақти маҳаллӣ роҳ пурра аз барф тоза шуд ва мошинҳо аз ду тараф дубора ба ҳаракат даромаданд. Барои таъмини амнияту бехатарии роҳҳо кормандони хадамоти наҷоти Кумита дар километрҳои 62 ва 72-и роҳи мошингарди Душанбе-Айнӣ навбатдории шабонарӯзӣ ташкил кардаанд.
Бориши шадиди борон сабаби болоравии сатҳи оби дарё, ҳаракати хок дар деҳаи Ғуломони ноҳияи Тоҷикобод шуд. Мавҷи азими об партовҳои канори рӯдхона ва сангҳоро дар километри 196-и роҳи мошингарди Душанбе-Рашт-Лахш-Қирғизистон ба соҳил баровард. Дар натиҷа роҳ маҳкам шуда, ҳаракати мошинҳо қатъ гардид.
Кормандони Ситоди Кумитаи мазкур дар гурӯҳи ноҳияҳои Рашт якҷо бо кормандони хадамоти роҳи Вазорати нақлиёти мамлакат бо истифода аз техника роҳро тоза карданд ва соати 06:35- и 11 март роҳ барои ҳаракати мошинҳо аз ду тараф боз шуд.
Ёдовар мешавем, ки ҳавои номусоид, боронҳои шадид, барф ва бодҳои тӯфонӣ то 13 март идома мекунанд. Дар ин рӯзҳо болоравии сатҳи оби рӯдхонаҳо, омадани сел, лағзиши тармаву ярч дар манотиқи гуногуни мамлакат аз эҳтимол дур нест.
Дар иртибот ба ин Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон аз шаҳрвандон ва меҳмонони ҷумҳурӣ хоҳиш мекунад, ки ҳангоми сафар дар минтақаҳои кӯҳӣ эҳтиёткор ва ҳушёр бошанд!
АМИТ "Ховар"