Таҷлили Рӯзи Парчами давлатӣ дар пойтахти Тоҷикистон

Имрӯз сокинон ва меҳмонони пойтахт Рӯзи Парчами давлатиро бо шукӯҳу шаҳомати беандоза дар саҳни Боғи Парчами миллӣ таҷлил намуданд. Дар ҷамъомади идона устодону донишҷӯёни донишгоҳҳои пойтахт ва намояндагони вазорату идораҳо ширкат намуданд.
Ҷавонон ба сардии ҳаво нигоҳ накарда, бо табъи болида сайру гашт мекарданд.
Рустам, яке аз иштирокчиёни фаъоли ҷамъомад, донишҷӯи соли якуми Донишгоҳи миллии Тоҷикистон баён дошт, ки «ҳар як ҷавони бо нангу номус бояд парчами кишвари худро азизу муқаддас дошта, бо амалҳои неку созанда онро боло бардорад. Ман чун як фарди солим ба Парчами давлатии Ҷумҳурии Тоҷикистон эҳтиром дошта, доимо кӯшиш ба харҷ медиҳам, ки ба ватани маҳбубам хизмат намоям. Мо ҷавонон бояд парчами худро на танҳо дар дохил, балки дар хориҷи кишвар низ чун Дилшод Назаров болои сар бардорем».
Хотиррасон мекунем, ки 29 октябри соли 2009 дар конфронс бахшида ба 15-солагии қабули Конститутсияи Ҷумҳурии Тоҷикистон аз ҷониби Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таҷлили Рӯзи Парчами давлатии Тоҷикистон ҳамчун иди миллӣ пешниҳод гардида, бори нахуст он 24 ноябри соли 2009 бо ифтихор аз давлату давлатдорӣ ва соҳибистиқлолию соҳибихтиёрӣ ҷашн гирифта шуд.

АМИТ «Ховар»

Tags: