Хабар

12 июл дар варзишгоҳи «Авиатор»-и пойтахт тими мунтахаби ҷавонони то 19-солаи Тоҷикистон дар як бозии дӯстона бо дастаи мунтахаби то 21-солаи Қирғизистон вориди майдон мешаванд.
Футболбозони кишварамон таҳти роҳбарии сармураббии нави худ Виталий Левченко ба бозиҳои ниҳоии «Чемпионати Осиё-2016», ки тирамоҳ дар Баҳрайн доир мегардад, имрӯзҳо дар шаҳри Норак омодагӣ мегиранд. Ин аввалин бозии таҷрибавии дастаи мунтахаб зери роҳбарии мураббиёни нав хоҳад буд.

Роҳбарияти бошгоҳи футболи «Истиқлол» рӯзи 10 июл бо тасмими худ ҳамаи мураббиёни дастаро ба истеъфо фиристодааст. Дар ин бора ба АМИТ «Ховар» аз Федератсияи футболи Тоҷикистон хабар доданд.
Ба ин тартиб, Мубин Эргашев — сармураббии дастаи «Истиқлол” ҳамроҳ бо ёваронаш аз вазифаашон барканор шудаанд. Ҳамакнун қаҳрамони чоркаратаи Тоҷикистонро ба нимаи дувуми мавсими имсолаи футбол ситоди нави мураббиён омода хоҳад кард.

Дастаи мунтахаби футболи Португалия, ки дар бозии финалӣ бар тими миллии Фаронса дар вақти иловагӣ бо ҳисоби 1:0 ғалаба кард, бори аввал дар таърих ба унвони чемпиони Аврупо даст ёфт.
Вохӯрии финалии Чемпионати Аврупо-2016 шаби 10-ум ба 11-уми  июл дар варзишгоҳи «Стад де Франс», дар шаҳри Сен-Дении наздикии Париж, миёни дастаҳои мунтахаби Фаронса ва Португалия бо ҳузури беш аз 80 ҳазор тамошобин баргузор шуд. Доварони ин бозӣ бо раҳбарии Марк Клаттенбург аз Англия буданд.