Хабар

Тоҷикистон ва Покистон ба ифоқа расиданд, ки барои дар шаҳри Душанбе гузаронидани гуфтушунидҳо байни «Толибон»* ва тоҷикони Афғонистон мусоидат хоҳанд кард. Дар ин бора имрӯз Президенти Ҷумҳурии Тоҷикистон муҳтарам Эмомалӣ Раҳмон дар нишасти матбуотӣ пас аз музокирот бо Сарвазири Ҷумҳурии Исломии Покистон Имрон Хон изҳор доштанд.

Муҳтарам намояндагони васоити ахбори омма,

Хонумҳо ва ҷанобон,

Қабл аз ҳама, мехоҳам бори дигар Сарвазири муҳтарами Ҷумҳурии Исломии Покистон, Ҷаноби Олӣ Имрон Хонро ба Тоҷикистон хайрамақдам бигӯям ва барои анҷом додани сафари расмӣ ба кишвари мо аз ӯ изҳори сипос намоям.

Пас аз анҷоми мулоқоту музокироти сатҳи олӣ аз руи натиҷаҳои он дар ҳузур ва бо иштироки Сарони давлатҳо муҳтарам Эмомалӣ Раҳмон ва муҳтарам Имрон Хон як қатор санадҳои нави ҳамкорӣ ба имзо расид.