Боғи фарҳангию фароғатӣ ва майдончаи варзишӣ дар деҳаи Пушинги ноҳияи Данғара ифтитоҳ гардид

Дар назди таваллудхона ва паҳлӯи мактаби навбунёд аз ҷониби соҳибкорони деҳа як мавзеи нообод ба маркази фарҳангию фароғатии “Пушинг” сайргоҳи мардум табдил дода шуд.

Масоҳати боғчаи фароғатӣ 0,70 гектарро ташкил дода, он ба таври замонавӣ бо истифода аз таҷҳизоти равшанидиҳанда оро дода шудааст. Равшан шудани роҳравҳо, бо чароғҳои ранга кашидани суратҳои диққатҷалбкунанда, 2 суҳбаткада ва нишастгоҳҳо аз ороишоти маркази истироҳату фароғат мебошад.

Ҳамчунин барои зебову назаррабо гаштани он дарахтони гуногуни ороишӣ шинонида шудааст. Акнун ин маҳал низ макони дилфиреби сайру тамошои мардум ва гулгашти фароғатии сокинон гашт.

Дар паҳлӯи боғчаи фарҳангӣ варзишгоҳи хурд барои бозии кӯдакону наврасон сохта шудааст.

Ҳадафи бунёди майдонча ҷалби насли оянда ба варзиш ва тарғиби тарзи ҳаёти солим мебошад.

Дар ин ҷо тамоми талаботи меъёрҳои бунёди варзишгоҳҳо ба инобат гирифта шудааст ва майдончаи варзишӣ ба стандартҳо мутобиқ мебошад.

АМИТ «Ховар»