Мақомоти иҷроияи ҳокимияти давлатии шаҳри Душанбе бо мақсади сазовор таҷлил намудани Рӯзи модар ва тарғиби тарзи ҳаёти солим аз 6 январ то 6 марти соли 2018 бо иштироки бонувони сохторҳои вазорату идора, раёсату муассиса ва ташкилоту корхонаҳои пойтахт барои дарёфти «Ҷоми Раиси шаҳри Душанбе» мусобиқаи волейболбозонро баргузор менамояд.
Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе хабар доданд, мусобиқа 6 январ бо бозии дастаҳои мақомоти иҷроияи ҳокимияти давлатии шаҳри Душанбе ва «Насли солим»-и Раёсати тандурустии шаҳри Душанбе оғоз гардид.
Дар мусобиқаи мазкур 25 дастаи бонувон байни худ қувваозмоӣ намуда, он дар арафаи Рӯзи модар- 6 марти соли 2018 ҷамъбаст мегардад.
Ғолибон бо «Ҷоми Раиси шаҳри Душанбе» ва мукофотҳои мақомоти иҷроияи ҳокимияти давлатии шаҳри Душанбе сарфароз мегарданд.
АМИТ "Ховар"