Дар шаҳри Хуҷанд бо иқдоми мақомоти ҳифзи муҳити зист амалиёти «Тозагии соҳил» гузаронида шуд, ки дар он доираи васеи омӯзгорону хонандагони Муассисаи давлатии таълимии «Литсейи касбии политехникии шаҳри Хуҷанд» фаъолона иштирок карда, дар натиҷа 2 километр соҳили Сирдарё, аз ҷумла минтақаи обутобҷои соҳили чапи дарёи Сирро аз партовҳо тоза намуданд. Иқдоми мазкур ба ифтихори ҷашни 30-солагии Истиқлоли давлатии Ҷумҳурии Тоҷикистон ва бо мақсади пешгирии ифлосшавии соҳилҳои дарёи Сир дар шаҳри Хуҷанди вилояти Суғд роҳандозӣ гардид.
Дар амалиёти «Тозагии соҳил» 250 нафар иштирок намуда, аз ҷониби Муассисаи махсуси нақлиётии партовкашонии шаҳри Хуҷанд дар маҷмӯъ 6 метри мукааб ахлоту хокрӯба ба партовгоҳ бароварда шуд.
Дар минтақаи обутобҷои соҳили чапи Сирдарё, новобаста аз фаслҳои сол сокинон пайваста ба машқҳои варзишии пагоҳирӯзӣ машғул мешаванд. Аз ин рӯ мунтазам тоза нигоҳ доштани ин минтақа, ки ба саломатии инсон вобастагӣ дорад, мувофиқи мақсад мебошад, зеро тозагӣ гарави саломатист.
АМИТ «Ховар»