Раёсати амнияти миллиии Афғонистон 12.01.2021 хабар додааст, ки гурӯҳи чоҳорнафарии аъзои “Давлати Исломии Ироқ ва Шом” (мамнуъ дар Тоҷикистон), ки қасд дошт иҷрокунандаи вазифаи сафири ИМА дар Афғонистон ва чанд мансабдори афғонро ба қатл бирасонад, боздошт шудааст, иттилоъ медиҳад АМИТ «Ховар» бо истинод ба шабакаи телевизионии 1tvnews.af.
Воҳиди дуюми Раёсати мазкур бо нашри хабарномае гуфтааст, ки ин гурӯҳ қасд дошт Росс Вилсон, иҷрокунандаи вазифаи сафири ИМА дар Афғонистон ва чанд мансабдори афғонро ҳадафи ҳамлаҳои террористии худ қарор бидиҳад.
Раёсати амният дар ин бора тафсилоти бештар надодааст ва сафорати ИМА дар Кобул то ҳол дар ин бора изҳори назар накардааст.
Ҷаноби Вилсон қаблан ҳамлаҳои ҳадафманди террористиро алайҳи рӯзноманигорон ва фаъолони ҷомеаи шаҳрвандӣ дар Афғонистон маҳкум карда буд.
АМИТ «Ховар»