Тибқи рақамҳои оморӣ, танҳо дар давоми 10 соли охир дар доираи қабули барномаҳои Даҳсолаи байналмилалии амал «Об барои ҳаёт», Соли байналмилалии оби тоза, Соли байналмилалии ҳамкорӣ дар соҳаи об беш аз 600 ҳазор нафар сокинони кишвар ба истифодаи оби тоза дастрасӣ пайдо намуда, 1,5 миллион нафар сокинон бо шароити беҳтари истифодаи об таъмин гардиданд. Бо вуҷуди ин, ҳоло дар Ҷумҳурии Тоҷикистон, аз ҷумла дар вилояти Суғд қариб 235 деҳа, 2 шаҳрак, 41 маҳалла, бо фарогирии зиёда аз 651 ҳазор аҳолӣ ба оби тозаи нӯшокӣ дастрасии пурра надоранд. Ин аст, ки бо мақсади татбиқи иқдомҳои наҷиби Пешвои миллат дар самти дастрасӣ ба оби нӯшокӣ дар миқёси вилояти Суғд Барномаи вилоятии «Соли 2017-соли дастрасии аҳолӣ ба оби тозаи нӯшокӣ» эълон гардида, аз оғози сол дар 18 шаҳру ноҳияҳои вилоят дар ин самт корҳои созандаги бомаром ҷараён доранд.
Самти фаъолияти Корхонаи воҳиди давлатии коммуналии «Хуҷандобуканал» ба таъминоти аҳолии маркази вилоят бо оби хушсифати ошомиданӣ равона гардидаст.
Тавре директори кулли КВДК «Хуҷандобуканал» Абдуносир Қодиров баён намуд, яке аз манбаъҳои таъминоти аҳолии шаҳри Хуҷанд бо оби тозаи нӯшокӣ сойи Хоҷа-Боқирғон, воқеъ дар ҷамоати Овчӣ-калъачаи ноҳияи Бобоҷон Ғафуров ба ҳисоб рафта, тавассути амалисозии лоиҳаи Ҳукумати ҷумҳурӣ ва дастгирии молиявии Бонки ҷаҳонӣ мавриди истифода қарор гирифтааст. Соли 2003 дар ин мавзеъ дар доираи лоиҳаи мазкур 12 чоҳи амудӣ кофта шуда, соли 2011 иншооти тозакунии оби нӯшокӣ низ ба истифода дода шуд. Иншооти номбурда инчунин дорои ду ҳавзи захиравии об бо ғунҷоиши 85 ҳазор метри кубӣ буда, об аз мавзеи номбурда то шаҳри Хуҷанд тавассути хаттҳои обӣ интиқол дода мешавад.
Ҳоло аз ҷониби мутахассисони корхонаи “Хуҷандобуканал” 12 чоҳи амудии ин иншоот, ки чанд муддат фаъолияти пурсамар надоштанд, аз таъмир бароварда шуда, навбати якуми обполоиш аз сангрезаҳои мармарии кӯҳнашуда ба миқдори 56 тонна тоза карда, дар чоҳи амудии №6 насоси чоҳӣ низ таъмир гардид. Иншоот чун иншооти муҳими рақами 1 бо муҳофизон таъмин карда шуд. Ғайр аз ин оид ба масъалаи безараргардони об, тибқи нақша аз ташхис гузаронидани он, тоза кардани ҳавзҳои захиравӣ, дар ҳолати зарурӣ нигоҳ доштани вазъи санитарии ҳудуди иншоот ва мақсаднок истифода бурдани об аз ҷониби масъулин тадбирҳои саривақтӣ андешида шуданд.
Абдуносир Қодиров зикр намуд, ки дар доираи барномаи мазкур масъалаи танқисии чандсолаи сокинони маҳаллаи «Чашмаи арзана», ки беш аз 550 оиларо дарбар мегирад ва дар як шабонарӯз ба онҳо ҳамагӣ то 3 соат об интиқол мегардид, бо дастгирии раиси шаҳри Хуҷанд ин мушкилот низ ҳалли худро ёфта, ҳоло сокинони ин маҳалла 12 соат бо об таъмин гаштаанд.
Ҳамзамон баҳри сари вақт таъмин намудани шаҳрвандон, корхонаю муассисаҳои шаҳр бо оби нӯшокӣ, қабул ва роҳӣ кардани ташноб аз тарафи мутахассисони «Хуҷандобуканал» аз 87 адад насосҳои чоҳҳои амудӣ 35 адади он аз таъмир бароварда шуда, беш аз 10 адад чоҳҳои амудии иншооти обдиҳӣ ва иншооти обболобардор бо насосҳои нав таҷҳизонида шуда, дар чоҳи амудии №16 -2 адад ҳавзи захиравии V—2000 м3 шуста безарар гардонида шуда, ҳамаи насосҳои обболобардори биноҳои баландошёна низ аз муоинаи техникӣ гузаронида шуданд. Дар иншооти партовобкаш низ корҳои ивази қисмҳои эҳтиётӣ ба иҷро расонида шуда, дар ҳамаи иншооти обдиҳӣ қуттиҳои идоракунии чоҳҳои амудӣ аз таъмири ҷорӣ бароварда шудаанд.
Вобаста ба сатҳ ва сифати таъминоти сокинони шаҳри Хуҷанд бо оби тозаи нӯшокӣ, Абдуносир Қодиров баён дошт, ки ҷомеаи меҳнатии КВДК «Хуҷандобуканал» азм дорад, дар доираи иҷрои барномаи вилоятӣ бо таъмир намудани шабакаҳои обрасонӣ, беҳтаргардонии ҳолати хатҳои обтаъминкунӣ ва иншооти обистеҳсолкунӣ, ҳамчунин сифати хизматрасониро ҷиҳати таъмини аҳолии маркази вилоят бо оби тозаи нӯшокӣ дар сатҳи баланд роҳандозӣ намуда, ба ин васила дар пешгирии хуруҷи касалиҳои сирояткунанда, ҳифзи саломатии сокинон, аз ҷумла кӯдакону наврасон саҳм гузорад. Илова бар ин, дар давоми 6 моҳ баҳри таъмин ва ҳифз намудани сифати оби нӯшокӣ, муҳофизати муҳити зист, мувофиқи меъёр ва қоидаҳои амалкунанда 1589 намунаҳои оби нӯшокӣ ва ташноб гирифта, 15 ҳазору 434 санҷиши кимиёвию бактериологӣ гузаронида шуданд.
Бояд гуфт, ки соли ҷорӣ дар доираи татбиқи Барномаи вилоятии «Соли 2017 — соли дастрасии аҳолӣ ба оби тозаи нӯшокӣ» дар миқёси вилояти Суғд бояд 492 км хатҳои оби нӯшокӣ аз таъмири асосӣ ва ҷорӣ бароварда шуда, 48 адад ҳавзҳои захиравӣ ва 19 адад чоҳҳои амудӣ таъмир, 213,6 км хатҳои оби нӯшокӣ, 23 адад ҳавзҳои захиравӣ ва 31 адад чоҳҳои амудӣ сохта шаванд.
АМИТ "Ховар"