Хабар

Дар Коллеҷи омӯзгории шаҳри Конибодом ба номи Мирзо Тунсунзода бахшида ба 85-солагии ин боргоҳи маърифат конфронси илмӣ-адабӣ баргузор гардид.  Раиси шаҳр Ғайбулло Боҳирӣ оид ба саҳми таълимгоҳ дар тайёр кардани кадрҳои баландихтисос ва роҳи тайнамудаи ин махзани дониш дар пешрафти ҷомеа сухан гуфт.

Дар шаҳри Гулистони вилояти Суғд сайёҳӣ ба яке аз соҳаҳои даромаднок табдил меёбад.
Тавре аз Хадамоти матбуоти вилоят хабар доданд, дар нуҳ моҳи соли 2016 аз минтақаҳои истироҳатию фароғатии шаҳр 16 ҳазору 456 нафар боздид намудаанд. Аз теъдоди умумии сайёҳон 2703 нафарашон аз кишварҳои хориҷӣ мебошанд.
Маблағи воридшуда аз ташрифи сайёҳон 15 миллиону 393,7 ҳазор сомониро ташкил дод, ки нисбат ба ҳамин давраи соли гузашта 2 миллиону 641,7 ҳазор сомонӣ зиёд мебошад.

Имрӯз дар толори фарҳангии ба номи Шарифҷон Ҳусейнзодаи Донишгоҳи миллии Тоҷикистон  конфронси илмию амалии ҷумҳуриявӣ дар мавзӯи «Масъалаҳои баҳсноки забони воситаҳои ахбори омма» баргузор мегардад.